91°µÍø

Cyfranogwyr yn y digwyddiad Dathlu ein Cymuned Amrywiol

Mae cwilt cyfeillgarwch unigryw yn cael ei blethu at ei gilydd mewn cydweithrediad creadigol yng nghanol dathliadau Wythnos Ffoaduriaid 91°µÍø.

Mae llawer o'r rhai sy'n cymryd rhan yn y prosiect, a drefnir gan y fenter Cymuned Greadigol ym Mhrifysgol 91°µÍø, wedi ymgartrefu yng Nghymru ar ôl ffoi rhag gwrthdaro neu erledigaeth yn eu gwledydd cartref, gan gynnwys Syria, Wcráin, Nigeria a Chamerŵn.

Mae'r prosiect yn dathlu hanes amrywiol a chymuned gyfoes Cymru drwy ddefnyddio technegau tecstilau arloesol a ffyrdd traddodiadol Cymreig o wneud cwiltiau yn unol â thema Wythnos Ffoaduriaid 2025, sef 'cymuned'.

Cefnogir y prosiect gan Gyngor Ffoaduriaid Cymru, ac yn ddiweddarach eleni bydd y cwilt gorffenedig Cyfeillgarwch 91°µÍø yn cael ei arddangos yn gyhoeddus ledled Cymru fel rhan o arddangosfa ‘Llunio Cenhedloedd’ y sefydliad.

Dywed y trefnwyr fod y gweithgaredd yn ffordd o ystyried sut y gall ymarfer creadigol helpu i feithrin cysylltiadau o fewn a rhwng cymunedau a chefnogi dealltwriaeth a gofal ar y cyd.   

Dywedodd y cyd-drefnydd Dr Katy Budge, darlithydd mewn Gwleidyddiaeth Ryngwladol ym Mhrifysgol 91°µÍø a chydlynydd y prosiect Cymuned Greadigol:

“Mewn cyfnod o wleidyddiaeth gynyddol elyniaethus a rhaniadol, mae'n bwysicach nag erioed ein bod yn dod at ein gilydd i greu cysylltiadau a sgyrsiau ar draws ffiniau canfyddedig. Drwy'r prosiect Cymuned Greadigol, rydym ni’n cydnabod, drwy ystyried safbwyntiau a mewnwelediadau sy'n aml yn cael eu gwthio i'r ymylon mewn sgyrsiau cyhoeddus, polisi ac academaidd - gan gynnwys rhai pobl sydd â hanes o ddadleoli a mudo - y gallwn ddysgu cymaint am sut y gallwn greu cymunedau ar y cyd sy'n ein cynnal ni i gyd.”

Lansiwyd prosiect Cwilt Cyfeillgarwch 91°µÍø yn y digwyddiad Dathlu Ein Cymuned Amrywiol yn y bandstand ar bromenâd 91°µÍø ddydd Sadwrn 21 Mehefin.

Yn ogystal â chyfrannu at y cwilt cyfeillgarwch, mwyhaodd ymwelwyr weithgareddau creadigol i blant, darlleniadau barddoniaeth gan Lysgenhadon Noddfa Aruni McShane a Dr Tarh Martha Ako Mfortem, perfformiadau gan gerddorion lleol, a'r cyfle i ddysgu dawns werin Arabaidd ac Wcrainaidd.

Dywedodd y cyd-drefnydd Dr Naji Bakti, awdur Libanaidd, darlithydd mewn Ysgrifennu Creadigol ym Mhrifysgol 91°µÍø, a chydlynydd y prosiect Cymuned Greadigol:

“Yn ein digwyddiad Wythnos Ffoaduriaid yn 2024, fe wnaethon ni ystyried pryderon, blaenoriaethau ac anghenion cymunedau ffoaduriaid yn 91°µÍø, a chlywson ni’r awydd cryf am fwy o gyfleoedd i gymryd rhan mewn ymarfer creadigol ar y cyd, ac i gysylltu â'n hamgylchedd cyfagos. Mae'r Cwilt Cyfeillgarwch yn plethu'r rhain at ei gilydd drwy ddathliad creadigol o gymuned a natur, ac yn ategu'r gweithgareddau eraill rydyn ni wedi'u cyflwyno dros y flwyddyn ddiwethaf gan gynnwys brodwaith, ffotograffiaeth, crefftau coetir a syrffio. Rydyn ni’n edrych ymlaen at gefnogi darparwyr gwasanaethau a llunwyr polisi i gymryd rhan mewn dulliau tebyg, er mwyn sicrhau bod mentrau cydlyniant cymunedol yn cael eu harwain gan flaenoriaethau cymunedau ffoaduriaid eu hunain.”

Ychwanegodd llefarydd ar ran Cyngor Ffoaduriaid Cymru:

"Mae prosiect Llunio Cenhedloedd yn un sy'n clymu celfyddydau, diwylliant a threftadaeth Cymru ynghyd. Nod y prosiect yw dod â nifer o gymunedau sy'n byw yng Nghymru ynghyd, gan gynnwys unigolion â chefndiroedd mudo i ystyried y edafedd cyffredin o ddiwylliant a chelf sy'n ein cysylltu ni i gyd. Mae'r prosiect hefyd yn dathlu hanes bywiog mudo yng Nghymru a sut mae wedi cyfrannu at adeiladu'r diwylliant Cymreig cyfoes rydyn ni'n ei adnabod ac yn ei garu heddiw. Mae Llunio Cenhedloedd yn enghraifft wych o ddod â phobl ynghyd mewn cyfnod o raniad."

Mae prosiect y Gymuned Greadigol yn cael ei ariannu gan Gyngor Ffoaduriaid Cymru yn ogystal â rhaglen AberCollab Prifysgol 91°µÍø, Cronfa Effaith Ymchwil a chanolfan ymchwil ‘Y Bydoedd a Garem’. Cafodd cydlynwyr y prosiect, Naji Bakhti a Katy Budge, eu cydnabod yn ddiweddar am eu gwaith yn cefnogi cymunedau ffoaduriaid yng Ngwobrau Cenedl Noddfa Cyngor Ffoaduriaid Cymru.

Rhannu